Aron: Við þurfum sigur á Old Trafford

Aron Einar Gunnarsson, leikmaður Cardiff City, segir að enska úrvalsdeildin sé í forgangi hjá liðinu.

Cardiff komst um helgina áfram í fimmtu umferð ensku bikarkeppninnar með 1-0 sigri á Bolton með marki Frazier Campbell.

„Þrátt fyrir að við eigum jafnvel möguleika á titli í bikarnum erum við einbeittir að leiknum gegn Manchester United á þriðjudag,“ sagði Aron Einar í samtali við breska fjölmiðla.

„Við erum í neðsta sæti og þurfum á sigri að halda. Við þurfum að safna stigum og það væri frábært að byrja á því á Old Trafford.“

„Þetta verður erfiður leikur - við vitum það. Þeir vilja bæta sína stöðu en við hlökkum til þess að spila við þá.“

Ole Gunnar Solskjær, stjóri Cardiff City, snýr aftur á sinn gamla heimavöll á morgun. „Ég er viss um að hann sé spenntur fyrir því en aðalmálið hjá honum verður að ná í þrjú stig.“