Kári og félagar með þrjú stig heim af Merseyside

Kári Árnason og félagar í Rotherham United unnu 2-1 útisigur á Tranmere Rovers í ensku C-deildinni í kvöld. Rotherham United er í fimmta sæti deildarinnar en liðið hefur náð í tíu stig úr síðustu fjórum deildarleikjum sínum.

Kári Árnason spilaði allan leikinn í kvöld og Rotherham-vörnin var afar nálægt því að halda marki sínu hreinu.

Hinn þrítugi framherji Alex Revell skoraði bæði mörk Rotherham United í leiknum, það fyrra á 39. mínútu en það síðara á 65. mínútu þegar hann kom liðinu í 2-0. Tranmere minnkaði muninn í lok leiks.

Rotherham-liðið er með þrjá sigra og eitt jafntefli í síðustu fjórum deildarleikjum sínum en liðið er nú aðeins einu stigi á eftir Preston sem situr sæti ofar í fjórða sætinu.

Efstu tvö liðin fara beint upp en liðin í 3. til 6. sæti taka þátt í umspili um síðasta lausa sætið.