Mourinho gæti leyft Mata og Essien að fara

Jose Mourinho, stjóri Chelsea, segist viljugur að ræða við þá Juan Mata og Michael Essien vilji þeir fara frá félaginu í mánuðinum.

Mata var tekinn af velli snemma í síðari hálfleik í 3-0 sigri Chelsea á Southampton í gær og brást illa við. Hann neitaði að taka í hönd Mourinho.

Mata hefur aðeins verið níu sinnum í byrjunarliði Chelsea þetta tímabilið en Essien þurfti að róa hann á varamannabekknum.

Mourinho vill þó ekki missa Mata. „Ég vil halda honum. Það er mín skoðun og mín ósk. En dyr mínar standa opnar fyrir honum,“ sagði Mourinho. „En ég vil ekki að félagið selji hann.“

Essien hefur sömuleiðis lítið fengið að spila en Mourinho vildi ekki bregðast sérstaklega við því. „Það er enginn leikmaður, hvorki Michael né nokkur annar, sem er með tryggðar mínútur inn á vellinum hjá mér.“

„Ég skil vel að leikmenn séu að hugsa um HM og að spila reglulega. Mínir leikmenn verða hins vegar að hugsa fyrst og fremst um hagsmuni liðsins. Það vita þeir.“