Solskjær ráðinn knattspyrnustjóri Cardiff

Velska liðið Cardiff, sem leikur í ensku úrvalsdeildinni, hefur gengið frá ráðningu Norðmannsins Ole Gunnar Solskjær í stöðu knattspyrnustjóra. Félagið tilkynnti þetta á blaðamannafundi í dag.

Solskjær tekur við starfinu af Malky Mackay sem var rekinn fyrir tæpri viku síðan. Solskjær var efstur á óskalista eigandans Vincent Tan sem sendi einkaþotu sína til Noregs í gærmorgun.

Norðmaðurinn var svo viðstaddur þegar að Cardiff tapaði fyrir Arsenal, 2-0, á Emirates-leikvanginum í gær en liðið situr nú í sautjánda sæti deildarinnar, einu stigi frá fallsæti.

Solskjær var lengi leikmaður Manchester United en hætti árið 2007 eftir þrálát hnémeiðsli. Hann hélt aftur til heimalandsins árið 2011 þar sem hann tók við Molde. Hann gerði liðið að meisturum fyrstu tvö ár sín þar en Molde hafnaði í sjötta sæti deildarinnar í haust. Liðið varð þó norskur bikarmeistari.

Aron Einar Gunnarsson er á mála hjá Cardiff og kom inn á sem varamaður í leik liðsins gegn Arsenal í gær.