Baines skrifaði undir nýjan samning

Svo virðist sem að Leighton Baines verði um kyrrt í herbúðum Everton en hann skrifaði undir nýjan fjögurra ára samning í dag.

Þetta staðfesti Roberto Martinez, stjóri Everton, í dag. „Við erum vægast sagt ánægðir með að hafa tryggt að Leighton Baines muni gefa Everton sín bestu ár í fótbolta,“ sagði Martinez á heimasíðu félagsins.

„Þetta veit á gott fyrir framtíðina. Leighton er nýorðinn 29 ára og býr yfir reynslu og þroska fyrir mjög sérhæfða stöðu á knattspyrnuvellinum,“ bætti Martinez við um vinstri bakvörðinn.

Baines kom til Everton frá Wigan árið 2007 en var sterklega orðaður við Manchester United í sumar, efir að David Moyes tók við stjórn liðsins. Baines á að baki meira en 260 leiki að baki með Everton og 22 með A-landsliði Englands.