Counago: Keane er skelfilegur þjálfari

Pablo Counago, fyrrverandi framherji Ipswich Town, hefur svarað Roy Keane fullum hálsi eftir að sá síðarnefndi gagnrýndi Spánverjann í nýútkominni ævisögu sinni, The Second Half.

Keane, sem stýrði Ipswich á árunum 2009-2011, vandar Counago ekki kveðjurnar í ævisögunni. Írinn sagði að Counago hafi verið húðlatur, honum hafi líkað illa við hann og verið nálægt því að ráðast á hann.

Counago lét Keane í kjölfarið heyra það í yfirlýsingu á stuðningsmannasíðu Ipswich.

„Ég gæti sagt margt miður fallegt um hann, en mér finnst ekki rétt að tala um hann. Ég vorkenni honum. Það er ástæðan fyrir því að ég móðgast ekki þegar hann talar um mig.

„Það er eins og hann hafi þörf fyrir að gagnrýna leikmenn, þjálfara og stjórnarmenn til að selja bækur því hann getur ekki gert neitt annað í fótboltanum,“ sagði Counago og bætti við:

„Eins og ég sagði honum einu sinni er hann skelfilegur þjálfari. Eins og hann sagði í bókinni vildi hann kýla mig, en bak við grímuna leynist heigull. Ég vona að hann finni hamingju í lífinu því það hlýtur að vera lýjandi að vera svona vansæll.“

Counago, sem spilar í Finnlandi í dag, skoraði 62 mörk í 243 leikjum fyrir Ipswich.