Kynlíf með fleiri en tuttugu konum sagt minnka líkur á krabbameini

Vísindamenn við Háskólann í Montreal í Kanada hafa komist að því að minni líkur séu á að menn fái blöðruhálskrabbamein, hafi þeir stundað kynlíf með tuttugu konum eða fleiri.

Niðurstöður rannsóknarinnar sýna að karlmenn sem hafa átt fleiri en tuttugu kvenkyns rekkjunauta séu um þriðjungi ólíklegri til að fá blöðruhálskrabbamein og 19 prósent ólíklegri til að fá sjúkdóminn í sinni skæðustu mynd.

Í frétt Telegraph kemur einnig fram að þeir karlmenn sem hafa sofið hjá tuttugu karlmönnum eða fleirum séu tvöfalt líklegri til að fá blöðruhálskrabbamein samanborið við karlmann sem hefur aldrei stundað kynlíf með öðrum karlmanni.

Vísindamennirnir segja að kynlíf með konum verji karlmenn að þessu leyti. Þá stundi lauslátir meira kynlíf en þeir sem séu í sambandi og aðhyllist einkvæni.

Á móti kemur fram að samkynhneigðir græði ekki á því að vera lauslátir, líkt og gagnkynhneigðir, þar sem þeir eigi á aukinni hættu að fá kynsjúkdóma og að kynlífið valdi líkama þeirra skaða. Samkvæmt rannsókninni eru hommar, sem einungis hafa stundað kynlíf með einum öðrum karlmanni, ekki líklegri til að fá blöðruhálskrabbamein.

Marie-Elise Parent, doktor við háskólann og sú sem fór fyrir rannsókninni, segir í samtali við Telegraph að aukinn fjöldi kvenkyns rekkjunauta stuðli mögulega að aukinni tíðni sáðláta sem hafi varnaráhrif gegn blöðruhálskrabbameini.

Parent segist þó ekki ætla að mæla sérstaklega með því að heilbrigðisyfirvöld hvetji karlmenn til að stunda kynlíf með sem flestum konum. Rannsóknin náði til rúmlega 3.200 manna sem voru rannsakaðir yfir fjögurra ára tímabil.