Moyes ekki af baki dottinn

Það er kurr í stuðningsmönnum Man. Utd eftir tvö töp á heimavelli í röð en slíkt hefur ekki gerst hjá félaginu í ellefu ár. Man. Utd er þess utan búið að tapa fimm leikjum í ensku úrvalsdeildinni í vetur.

Eftir um 20 ára partí undir stjórn Sir Alex Ferguson hafa timburmenn bankað á hurðina á Old Trafford. United er þrettán stigum á eftir toppliði Arsenal og titlavonir meistaranna nánast horfnar nú þegar.

Stjóri liðsins, David Moyes, er undir mikilli pressu og margir stuðningsmenn félagsins vilja losna við hann eigi síðar en í gær. Moyes telur þó að meirihluti þeirra sé þolinmóður.

"Þeir skilja samhengið í stóru myndinni. Þeir skilja út á hvað þetta gengur. Auðvitað er hundfúlt að tapa leikjum og mér finnst það líka. Ég þarf að standa mig betur eins og allir," sagði Moyes.

"Við erum nokkurn veginn með sama hóp og vann deildina í fyrra. Ég þarf að sjá til þess að leikmenn sýni sitt besta í hverjum leik."