City valtaði yfir andlaust lið Tottenham | Sex marka niðurlæging

Manchester City átti ekki í vandræðum með Tottenham á heimavelli sínum í ensku úrvalsdeildinni í dag. City vann leik liðanna 6-0 en staðan í hálfleik var 3-0.

Jesús Navas gaf tóninn strax á 14. sekúndu þegar hann lyfti boltanum yfir Hugo Lloris í marki Tottenham og í stöngina og inn.

Tottenham var líklegt til að jafna metin en tvö mörk á sjö mínútum í fyrri hálfleik gerðu út um leikinn.

Fyrst varð Sandro fyrir því óláni að skora sjálfsmark á 34. mínútur og á 41. mínútu lagði Sergio Agüero boltann í netið eftir fyrirgjöf Navas og staðan 3-0.

Andre Villas-Boas náði ekki að vekja vonarneista í brjósti leikmanna Tottenham í hálfleiknum. Liðið mætti jafn andvana til leiks eftir hálfleikinn og í byrjun og Sergio Agüero skoraði aftur á 50. mínútu. Fimm mínútum síðar bætti Negredo fimmta markinu við.

Gylfi Sigurðsson byrjaði leikinn á bekknum hjá Tottenham og kom inn á 61. mínútu og náði ekki að setja mark sitt á leikinn enda úrslitin ráðin og enginn kraftur í liði Tottenham.

Navas skoraði annað mark sitt í uppbótartíma og fullkomnaði niðurlægingu Tottenham. City hefur skorað 26 mörk á heimavelli og unnið alla sex leiki sína heima sem er besta byrjun á heimavelli frá byrjun Tottenham 1962.

Manchester City lyfti sér upp í fjórða sæti deildarinnar með sigrinum. Liðið er með 22 stig, sex stigum minna en topplið Arsenal.

Tottenham féll með tapinu niður í 9. sæti þar sem liðið situr með 20 stig og þrjú mörk í mínus í markatölu.