Moyes: Zaha hefur ekki gert neitt rangt

David Moyes, knattspyrnustjóri Manchester United, leyfir væntanlega Wilfried Zaha að fara á láni í janúar en þessi fyrrum leikmaður Crystal Palace hefur ekki fengið að spila eina einustu mínútu í ensku úrvalsdeildinni í vetur.

„Við munum reyna að sjá til þess að hann fá mínútur en því miður hefur það ekki tekist ennþá með Wilf. Ef að staðan verður sú sama í janúar þá gætum við athugað með að lána hann," sagði David Moyes á heimasíðu Manchester United.

„Ég hef sagt honum að ég ætla að reyna að finna mínútur fyrir hann en það er bara mikil samkeppni í hans stöðu í liðinu. Við erum líka með menn eins og Nani, Antonio Valencia, Ashley Young, Adnan Januzaj og jafnvel Shinji Kagawa," sagði Moyes.

„Það er ekki eins og Wilf hafi gert eitthvað rangt. Samkeppnin er bara svona mikil. Hann er samt í mínum framtíðarplönum og ég er alltaf að hugsa um hvað sé best fyrir hann," segir Moyes.