Bardsley saknar ekki Di Canio

Phil Bardsley, varnarmaður Sunderland, var ekkert sérstaklega ánægður með lífið er Paolo di Canio var stjóri liðsins en hann er mjög ánægður með arftakann, Gus Poyet.

Hann lenti ítrekað í deilum við Di Canio sem hann segir hafa reynt að eyðileggja ferilinn sinn. Di Canio henti skoska landsliðsmanninum tvisvar úr leikmannahópnum.

Bardsley var reyndar ekkert að hjálpa sjálfum sér mjög mikið er hann var myndaður á spilavíti seint um morgun á leikdegi. Þá sagði Di Canio að hann myndi aldrei spila aftur fyrir félagið.

Hann hefur síðan komið til baka og skoraði sigurmarkið gegn Man. City um síðustu helgi.

"Knattspyrnumaður verður að láta verkin tala á vellinum. Ég lenti í atvikum sem voru erfið fyrir mig og fjölskyldu mína. Það er allt að baki núna," segir Bardsley.

"Það er nýtt líf núna með Poyet og ég elska að spila í dag. Þetta er allt annað líf og ég vil endilega spila sem lengst hérna núna."

Svipmyndir úr viðureign Sunderland og City fylgja fréttinni hér að ofan.