Heimasíða Manchester United: Zaha kemur í júlí

Manchester United er búið að staðfesta það á heimasíðu sinni að félagið hafi komist að samkomulagi við Crystal Palace um að kaupa vængmanninn Wilfried Zaha. Leikmaðurinn á bara eftir að fara í gegnum læknisskoðun seinna í dag.

„Við munum ekki ræða þetta mál frekar fyrr en að Wilfried gerist leikmaður Manchester United í júlí 2013," segir ennfremur á heimasíðu Manchester United en Wilfried Zaha tjáir sig aftur á móti um nýja félagið sitt á heimasíðu Crystal Palace.

„Ég er mjög ánægður með að komast til Manchester United og það er gott að binda enda á allar getgáturnar. Ég vil þakka eigendum Palace fyrir að gera þetta mögulegt en næstu fimm mánuði mun ég einbeita mér eingöngu að Crystal Palace," sagði Wilfried Zaha en United lánar hann aftur til Crystal Palace fram á vor.

Hinn tvítugi Wilfried Zaha er með 5 mörk og 6 stoðsendingar í 27 leikjum með Crystal Palace í ensku b-deildinni á þessu tímabili en 9 af þessum 11 mörkum sem hann hefur átt þátt í komu fyrir 12. nóvember eða fram að því að hann spilaði sinn fyrsta landsleik á móti Svíum.

„Ég hef verið hjá Palace í meira en tíu ár. Ég mun alltaf elska félagið og ég vil hjálpa til að koma Palace aftur upp í ensku úrvalsdeildina ekki síst fyrir stuðningsmennina sem hafa verið mér svo góðir," sagði Zaha.