Deila Þýskalands og Bandaríkja harðnar

Angelu Merkel Þýskalandskanslara virðist loks nóg boðið. Hún ólst upp í Austur-Þýskalandi, þar sem stjórnvöld hleruðu síma íbúanna í tíma og ótíma. Nú er komið í ljós að hún hefur sætt þessu sama af hálfu Bandaríkjamanna, einnar helstu vinaþjóðar Þjóðverja, allar götur síðan 2002 – eða frá því nokkrum árum áður en hún tók við kanslaraembættinu.

Þetta fullyrðir þýska tímaritið Der Spiegel, sem segist hafa undir höndum skjöl þessu til staðfestingar. Skjölin benda einnig til þess að Barack Obama Bandaríkjaforseti hafi vitað af þessum hlerunum allt frá árinu 2010, en hann tók við forsetaembættinu í byrjun árs 2009.

Þessar upplýsingar benda til þess að njósnir Bandaríkjanna um ráðamenn í öðrum ríkjum hafi verið harla víðtækar.

Merkel hefur til þessa, rétt eins og flestir aðrir þjóðarleiðtogar í Evrópu, forðast að fara í hart gegn Bandaríkjunum, enda veit hún sem er að njósnastofnanir eru starfandi í flestum stærri ríkjum heims, þar á meðal í Þýskalandi, og að vinnubrögðin eru sambærileg í flestum atriðum.

Hún hefur að vísu mótmælt og sagt að svona eigi ríki ekki að koma fram við vinaþjóðir sínar. Allt bendir hins vegar til þess að hún geti ekki setið aðgerðalaus öllu lengur.

Eitt af því sem kemur til greina er að fresta eða hætta við samningaviðræður um fríverslunarbandalag Evrópusambandsins og Bandaríkjanna. Merkel gæti þó verið treg til þess, því svo virðist sem Þjóðverjar muni hagnast einna mest á slíkum samningum.

Franskir og þýskir ráðamenn hafa hug á að gera samning við Bandaríkin um að ríkin þrjú hætti að njósna hvert um annað. Vonast er til að slíkur samningur verði að veruleika fyrir áramót.

Hans-Peter Friedrich, innanríkisráðherra Þýskalands, hefur sagt að njósnir Bandaríkjanna varði við lög og hótar að fara með málið fyrir dómstóla.

Þá þykir líklegt að ný stjórn í Þýskalandi, en stjórnarmyndunarviðræður standa yfir þessa dagana, setji á laggirnar sérstaka rannsóknarnefnd til að fara ofan í saumana á njósnum bandarísku leyniþjónustunnar um þýska ráðamenn.