Lundúnaslagur og van Persie snýr aftur

Andre Villas-Boas, stjóri Tottenham, jók spennuna fyrir viðureign liðsins gegn grönnunum Chelsea á fundi með blaðamönnum. Portúgalinn sagði samband sitt við Jose Mourinho, kollega og landa hjá Chelsea, ekki lengur náið. Villas-Boas var hægri hönd Mourinhos í velgengninni hjá Porto, Chelsea og Inter.

„Samband okkar var frábært bæði faglega og persónulega en svo er ekki lengur,“ sagði Villas-Boas. Hann sagðist þó ekki missa svefn yfir því. Spurður um samband þjálfaranna sagði Mourinho það ekki koma neinum við nema þeim tveimur.

Stuðningsmenn Manchester United geta tekið gleði sína á nýjan leik því Robin van Persie er mættur aftur eftir fjarveru vegna meiðsla. David Moyes, stjóri United, staðfesti að Hollendingurinn myndi koma við sögu. Skotinn fékk uppreisn æru með deildarbikarsigri á Liverpool í vikunni.

Mesut Özil gæti lagt upp mark fyrir Arsenal þriðja deildarleikinn í röð eða opnað markareikninginn í heimsókn til Wales. Lærisveinar Michaels Laudrup eru særðir eftir tap gegn b-deildarliði Birmingham í deildarbikarnum en fjölmargir sterkir leikmenn voru hvíldir.