Tíu milljarðar standa Moyes til boða

Glazer fjölskyldan, meirihlutaeigandi í Manchester United, mun styðja við bakið á knattspyrnustjóranum David Moyes kjósi hann að styrkja liðið í félagaskiptaglugganum.

Stjóri Manchester United er sagður velta fyrir sér fimmtíu milljóna punda tilboði, jafnvirði um tíu milljarða íslenskra króna, í Leighton Baines hjá Everton og Ander Herrera hjá Athletic Bilbao. Moyes reyndi að klófesta þá báða í sumar en án árangurs.

Peningarnir standa Moyes til boða. Hann þarf þó að hafa í huga stefnu félagsins í félagaskiptamálum. Þannig mun hann aðeins fá til sín leikmenn sem eru peninganna virði að því er Guardian greinir frá.

Heimildir blaðsins herma einnig að forráðamenn United átti sig á því að fyrsti félagaskiptaglugginn hjá Moyes yrði erfiður. Mögulega hafi verið gerð mistök að leyfa samningi Skotans að renna út hjá Everton í staðinn fyrir að kaupa hann upp í lok leiktíðar. Þannig mætti Moyes ekki til starfa hjá United fyrr en 1. júlí sem margir telja hafa verið of seint.