Var á hverjum degi hræddur um að Suarez myndi fara

Knattspyrnumaðurinn Steven Gerrard, fyrirliði Liverpool, hefur nú viðurkennt að hann hafi óttast að Luis Suarez myndi yfirgefa félagið í sumar.

Úrúgvæinn hefur nú snúið til baka á völlinn eftir tíu leikja bann sem hann fékk síðasta vor eftir að hafa bitið Branislav Ivanovic, leikmann Chelsea, í leik liðanna.

Suarez gerði tvö mörk í 3-1 sigri Liverpool á Sunderland á sunnudaginn.

Leikmaðurinn var orðaður frá Liverpool í allt sumar og vildi Suarez á tímabili sjálfur yfirgefa liðið.

„Þegar maður er með eins góðan leikmann og Luis Suarez, þá veit maður að önnur félög vilja klófesta leikmanninn,“ sagði Gerrard.

„Ég vaknaði upp alla daga og vonaði að Suarez myndi ekki fara frá okkur. Það reyndi enginn jafnmikið og ég að sannfæra hann um að vera áfram. Ég vissi að það myndi auka líkur okkar á að gera góða hluti í vetur.“