Getur ekki tekið lögin í eigin hendur

Leikmannasamtökin í Englandi hafa kvartað undan framkomu Paolo Di Canio, knattspyrnustjóra Sunderland.

Di Canio gagnrýndi nokkra leikmenn sína harkalega eftir að myndir af þeim í annarlegu ástandi birtust í ensku blöðunum. Di Canio beitti þá einnig sektum. Sumir þeirra eru ósáttir við framkomu stjórans og leituðu til samtakanna.

„Hann getur ekki tekið lögin í eigin hendur,“ sagði Gordon Taylor, framkvæmdarstjóri leikmannasamtakanna. „Við vitum af ummælum hans og fleiri uppákomum því tengdum. Þetta snertir allmarga leikmenn.“

„Við þurftum einnig að skipta okkur af honum þegar hann var stjóri Swindon. En reglur um viðurlög leikmanna hafa verið samþykktar af ensku úrvalsdeildinni og enska knattspyrnusambandinu.“