Chicharito orðaður við Arsenal

Javier Hernandez, framherji Manchester United, er orðaður við Arsenal í enskum miðlum í morgun. Á meðan Arsenal sárvantar framherja er nóg til af þeim á Old Trafford þar sem samkeppnin um framherjastöðurnar er mjög mikil.

Daily Mail hefur heimildir fyrir því að Arsenal sé að íhuga tilboð í landsliðsframherja Mexíkó sem hefur fengið lítið að spreyta sig með United á tímabilinu. Njósnarar Arsenal hafa að samkvæmt frétt blaðsins eytt miklum tíma í Chicharito að undanförnu.

Arsene Wenger, knattspyrnustjóri Arsenal, hefur áhyggjur af álaginu á Olivier Giroud sem virðist vera eina nothæfa "nían" hjá Frakkanum því framtíð Danans Nicklas Bendtner er allt annað staðar en hjá Arsenal.

Arsenal má ekki við því að missa Olivier Giroud í meiðsli eða leikbann og því verður Wenger að finna nýjan framherja í janúar. Wenger dreymir enn um að fá til sín Luis Suarez frá Liverpool en það raunhæfara að næla í Chicharito.

Javier Hernandez hefur aðeins fengið að spila 111 mínútur í fyrstu tíu umferðum ensku úrvalsdeildarinnar og hefur komið inná sem varamaður í þremur af fjórum leikjum sínum. Chicharito hefur skorað 4 mörk í 9 leikjum í öllum keppnum með United á leiktíðinni.