Vissara fyrir Young að haga sér gegn Zabaleta

Spennan er farin að magnast fyrir leik Manchester-liðanna á sunnudag. Afar áhugavert verður að fylgjast með rimmu Pablo Zabaleta, varnarmanns Man. City, og Ashley Young, leikmanns Man. Utd.

Zabaleta þykir einn heiðarlegasti leikmaðurinn í deildinni en slíkt hið sama verður ekki sagt um Young sem á það til að falla allt of auðveldlega til jarðar. Hann fékk síðast gult spjald fyrir leikaraskap um síðustu helgi.

Zabaleta er ekki hrifinn af því að leikmenn séu með leikaraskap. Hann vildi ekki ræða samt sérstaklega um Young.

"Ég held því miður að þetta sé orðið hluti af menningunni. Ég spilaði á Spáni í þrjú ár og leikmenn þar eru líka að dýfa sér allt of mikið," sagði Zabaleta.

"Stuðningsmenn hérna hata menn sem dýfa sér. Þess vegna eru menn sem gera þetta ítrekað teknir af lífi á Englandi.

"Ég væri ekki sáttur ef einhver meðspilari minn væri að dýfa sér. Ég myndi tala við hann og fá hann til þess að hætta þessari vitleysu. Þetta er vandamál og alls ekki nógu gott."