Rooney: Viðureignir okkar við Liverpool eru stærri

Wayne Rooney hefur verið frábær með liði Manchester United það sem af er leiktíðar en eins og frægt er orðið  ku leikmaðurinn hafa haft áhuga á því að yfirgefa liðið í sumar.

Wayne Rooney virðist vera orðinn sáttur við dvölina í Manchester en hann heldur því fram að leikir Manchester United og Liverpool séu mun stærri viðureignir en grannaslagur United og Man. City.

Manchester City tekur á móti United á Manchester-vellinum á morgun.

„Vissulega eru báðar viðureignir stórar en leikir okkur gegn Liverpool hafa verið aðalleikirnir síðustu áratugi,“ sagði Rooney í viðtali ytra.

„Manchester City hefur náð þessum góða árangri nýlega og því myndi ég segja að leikir okkar gegn Liverpool séu mun stærri viðureignir.“

„Þetta verður samt sem áður svakalegur leikur milli tveggja liða sem eiga eftir að berjast um titilinn á tímabilinu. Niðurstaða leiksins á samt sem áður ekki eftir að ráða úrslitum á endanum.“