Starf Villas-Boas sagt hanga á bláþræði

Enska dagblaðið The Guardian slær því upp í dag að forráðamenn Tottenham íhugi nú að losa sig við knattspyrnustjórann Andre Villas-Boas eftir 6-0 tap liðsins fyrir Manchester City um helgina.

Tottenham mætir norska liðinu Tromsö í Evrópudeild UEFA á fimmtudag og á svo mikilvægan leik gegn Manchester United í ensku úrvalsdeildinni á sunnudag.

Í umfjöllun Guardian segir að innanbúðarmenn hjá Tottenham séu óánægðir með að Villas-Boas virðist viljugur að skella skuldinni á alla aðra en sjálfan sig þegar illa gengur - allt frá stuðningsmönnum til sjúkraliða.

Hann sagði svo í fjölmiðlum eftir tapið um helgina að leikmenn Tottenham ættu að skammast sín fyrir frammistöðuna gegn City. Munu þau ummæli hafa farið illa í leikmenn félagsins.

Í grein The Guardian er víða komið við og segir þar meðal annars að 3-0 tap Tottenham fyrir West Ham á heimavelli í byrjun síðasta mánaðar hafi valdið miklum áhyggjum. Þá þykja dýrir leikmenn sem Villas-Boas fékk til Tottenham í sumar hafa valdið vonbrigðum.

Tottenham er í níunda sæti deildarinnar með 20 stig að loknum tólf leikjum. Liðið hefur ekki unnið í þremur deildarleikjum í röð og fengið átta stig af 21 mögulegu í síðustu sjö leikjum sínum.

Gylfi Þór Sigurðsson er á mála hjá Tottenham.