Snertingar Skrtel breyttu öllu | Myndband

Glæsimark Steven Gerrard var eina sárabótin fyrir Liverpool í 3-1 tapi gegn Hull í ensku úrvalsdeildinni í knattspyrnu í dag.

Jake Livermore kom Hull yfir á 20. mínútu þegar sakleysislegt skot utan af velli fór af Martin Skrtel og yfir Simon Mignolet í marki Liverpool. Stuðningsmenn Hull ærðust enda hafði liðið verið öllu lakari aðilinn í leiknum þegar þarna var komið við sögu.

Liverpool fékk aukaspyrnu rétt utan teigs skömmu síðar. Steven Gerrard nýtti sér öryggisleysi Alan McGregor í marki heimanna. Spyrnan var þéttingsföst í markmannshornið og McGregor hafði ekki einu sinni hönd á bolta.

Jafnt var 1-1 í hálfleik og það var ekki fyrr en á 72. mínút að David Meyler skoraði með föstu vinstri fótarskoti innan teigs. Vörn Liverpool mistókst að hreinsa boltann í burtu og Írinn í liði Hull nýtti sér það.

Tom Huddlestone, sem Hull fékk frá Tottenham í ágúst líkt og Livermore, lét svo vaða á mark gestanna þremur mínútum fyrir leikslok. Aftur varð Slóvakinn Skrtel fyrir því óláni að stýra boltanum í netið með snertingu sinni.

Stuðningsmenn Hull og Arsenal fögnuðu vel í leikslok. Hull er komið í 10. sæti deildarinnar með 17 stig og Arsenal heldur nú sjö stiga forskoti á toppi deildarinnar.

Liverpool féll við tapið niður í þriðja sæti deildarinnar. Liðið hefur lakari markatölu en Chelsea sem tekur á móti Southampton í dag.