Vill hvergi vera nema hjá Arsenal

Arsene Wenger, knattspyrnustjóri Arsenal, segist vera tilbúinn að framlengja samning sinn við Lundúnafélagið.

Stan Kroenke, meirihlutaeigandi Arsenal, hefur lýst yfir skoðun sinni að hann vilji að Frakkinn 63 ára skrifi undir samning til lengri tíma. Núgildandi samningur Wenger rennur út í lok leiktíðar.

Í ljós stuðningsyfirlýsingar Kroenke ræddi Wenger á léttu nótunum við blaðamenn um framtíð sína hjá félaginu.

„Það væri frábært að vera hérna endalaust enda myndi það gera mig ódauðlegan,“ sagði Wenger léttur á blaðamannafundinum í gær. Hann ítrekaði ást sína á félaginu þar sem hann hefur starfað frá árinu 1996.

„Það jákvæða við mig er að það þarf ekki að sannfæra mig um að framlengja núgildandi samning við félagið,“ sagði Wenger. Það skipti þó ekki mestu máli sem stendur.

„Ég vil umfram allt að liðið standi sig vel á leiktíðinni og enginn getur sett spurningamerki við ást mína á félaginu.“

Arsenal sækir Swansea heim á morgun í síðdegisleiknum í ensku úrvalsdeildinni.