Brendan Rodgers: Við seljum ekki leikmenn til okkar helstu keppninauta

Brendan Rodgers, knattspyrnustjóri Liverpool, var spurður út í eltingarleik Arsneal við stjörnuleikmann hans Luis Suarez í sumar. Liverpool mætir einmitt Arsenal á Emirates-leikvanginum í ensku úrvalsdeildinni á laugardaginn.

„Ég skil alveg af hverju þeir hafa áhuga en við seljum ekki okkar leikmenn til okkar helstu keppninauta og erkifjenda. Ég hef einnig séð meiri þroska hjá Luis að undanförnu," sagði Brendan Rodgers

Luis Suarez hefur skorað sex mörk í fjórum deildarleikjum síðan að hann snéri aftur eftir leikbann og í þeim eina sem hann skoraði ekki í þá átti Úrúgvæmaðurinn tvær stoðsendingar á félaga sína.

Rodgers var ennfremur fengin til að segja frá sinni upplifun að standa í þessu fjölmiðlafári sem varð þegar Luis Suarez vildi komst til Arsenal.

„Þetta var ekki auðveldur tími en við vorum harðir á því að halda okkar forystu í málinu og sannfærðum Luis um að hann gæti náð sínum markmiðum hjá Liverpool," segir Rodgers.

Það er hægt að sjá þrennu Luis Suarez frá síðustu helgi með því að smella á tengilinn hér fyrir ofan.