Jermain Defoe fær 17,7 milljónir á viku hjá Toronto

Daily Mirror slær því upp í morgun að enski landsliðsframherjinn Jermain Defoe sé á leiðinni til kanadíska liðsins Toronto FC í janúarglugganum. Tottenham mun fá um sex milljónir punda fyrir leikmanninn eða 1,2 milljarða íslenskra króna.

Jermain Defoe á að hafa samþykkt samningstilboð MLS-liðsins í síðustu viku en þetta er fjögurra ára samningur. Defoe er orðinn 31 árs gamall og mun því væntanlega enda feril sinn í Kanada.

Það er kannski ekkert skrýtið að kappinn ákveði að skella sér til Kanada því í frétt Daily Mirror kemur fram að hann sé að fá 90 þúsund pund á viku eða um 17,7 milljónir íslenskra króna.

Defoe mun hitta fyrir Ryan Nelsen hjá Toronto en Ryan Nelsen lék með Defoe hjá Tottenham á sínum tíma en er nú knattspyrnustjóri Toronto-liðsins.

Andre Villas-Boas, knattspyrnustjóri Tottenham, keypti Spánverjann Roberto Soldado á 26 milljónir punda í sumar og Jermain Defoe hefur fyrir vikið fengið fá tækifæri í ensku úrvalsdeildinni.

Defoe hefur ekki skorað í átta leikjum (7 sem varamaður, 191 mínúta) í ensku úrvalsdeildinni en er með 7 mörk í 5 leikjum í Evrópudeildinni.