Sigur hjá Kára en tap hjá Birni Bergmann

Kári Árnason og félagar hjá Rotherham eru komnir í sjötta sæti ensku c-deildarinnar eftir 4-1 heimasigur á Gillingham í dag. Kári spilaði í hjarta varnarinnar venju samkvæmt hjá þeim rauðklæddu.

Rotherham er taplaust í síðustu sjö leikjum sínum og útlitið ágætt. Sjötta sætið er hið síðasta sem gefur sæti í úrslitakeppninni í lok tímabils en nóg er nú eftir af deildinni.

Björn Bergmann Sigurðarson kom inn á sem varamaður hjá Wolfes sem tapaði 1-0 á útivelli gegn Peterborough. Skagamaðurinn, sem vill komast burtu frá Úlfunum í janúarglugganum, fékk gult spjald skömmu eftir að hafa komið inn á.

Wolves, sem féll úr b-deildinni í fyrra, er í öðru sæti deildarinnar með jafnmörg stig og topplið Leyton Orient en lakara markahlutfall.