City lenti undir en svaraði með þremur

Manchester City vann sannfærandi 3-1 sigur á Everton í hádegisleiknum í ensku úrvalsdeildinni í knattspyrnu í dag.

Þrátt fyrir sögusagnir um annað var Joe Hart á sínum stað í marki heimamanna. Hann þurfti þó að sækja boltann í netið snemma leiks þegar Romelu Lukaku nýtti sér sofandahátt í vörn heimamanna og skoraði.

City jafnaði metin innan mínútu þegar Alvaro Negredo kláraði færi sitt vel eftir frábæran undirbúning Yaya Toure.

Heimamenn höfðu yfirburði út hálfleikinn og komust yfir undir lok hans. Everton tapaði boltanum á slæmum stað. David Silva þræddi boltann inn á Sergio Aguero sem skoraði úr þröngu færi.

Eina mark síðari hálfleiksins kom úr vítaspyrnu. Markið var nokkuð skrautlegt. Boltinn fór af stönginni og í Tim Howard, markvörð Everton, og þaðan í netið.

City hefði getað bætt við fleiri mörkum. Samir Nasri fékk meðal annars dauðafæri í viðbótartíma en Howard varði vel.

Með sigrinum kemst City upp að hlið Liverpool og Tottenham í annað sæti deildarinnar með 13 stig. Everton tapaði sínum fyrsta leik og hefur 12 stig í 5. sæti.