Loic Remy skoraði tvö gegn Aroni og félögum

Newcastle vann dýrmætan 2-1 sigur á Cardiff City í 7. umferð ensku úrvalsdeildarinnar í knattspyrnu. Loic Remy skoraði bæði mörk Newcastle.

Fyrra mark Frakkans var sérstaklega flott. Þá negldi hann boltanum í netið eftir góðan sprett upp vinstri kantinn. Seinna mark kappans var einfaldara en þá lagði hann boltann í netið eftir að David Marshall varði skot Papiss Cisse. 2-0 í hálfleik fyrir gestina.

Cardiff var ekki með í fyrri hálfleiknum en bættu leik sinn í þeim síðari. Aron Einar Gunnarsson vann boltann af harðfylgi á 58. mínútu. Landsliðsfyrirliðinn bar boltann upp, kom honum á varamanninn Jordan Mutch. Mutch læddi boltanum inn á Peter Odemwingie sem skoraði af yfirvegun.

Heimamenn sóttu og var Aron Einar hársbreidd frá því að jafn metin eftir skot Craig Bellamy úr þröngu færi. Gestirnir frá Norður-Englandi héldu haus og unnu dýrmætan sigur.

Newcastle hefur 10 stig um miðja deild en Cardiff er aðeins neðar með átta stig.