Dalglish snýr aftur til Liverpool

Kenny Daglish hefur þekkst boð Fenway Sports Group og Liverpool um að taka sæti í stjórn knattspyrnufélagsins Liverpool.

Dalglish, sem er goðsögn hjá félaginu eftir sigursæla tíð sem leikmaður og þjálfari, segir það mikinn heiður að hafa verið boðið sæti í stjórninni.

„Ég hef alltaf sagt að ef það væri eitthvað sem ég gæti gert til þess að aðstoða félagið þá væri ég klár. Þegar kallið kom var ég aldrei í vafa,“ sagði Skotinn á heimasíðu Liverpool.

John Henry, meirihlutaeigandi í Liverpool, og Brendan Rodgers, knattspyrnustjóri félagsins, fagna endurkomu Dalglish.

„Við erum stolt að hafa fengið Kenny aftur til félagsins þar sem hann var svo glæsilegur fulltrúi í áratugi.“