Góð helgi fyrir lið United og Liverpool - öll mörkin á einum stað

Robin van Persie felldi sína gömlu félaga í Arsenal í stórleik ensku úrvalsdeildarinnar í gær og hjálpaði Liverpool að minnka forskot Arsenal í tvö stig. Arsenal var búið að standast tvö próf, með því að vinna Liverpool í toppslagnum um síðustu helgi og Dortmund í Meistaradeildinni í vikunni, en tókst ekki að halda fimm stiga forskoti sínu á toppnum.

Van Persie hefur nú skorað í öllum þremur deildarleikjum sínum á móti Arsenal og United hefur náð í sjö stig af níu mögulegum. „Frábærir leikmenn skora frábær mörk í stórum leikjum og Van Persie er frábær leikmaður,“ sagði David Moyes, knattspyrnustjóri Manchester United.

Sigur Manchester United og töpuð stig hjá Arsenal, Chelsea, Tottenham og Manchester City þýða að United-menn eru skyndilega komnir inn í toppbaráttuna, nú fimm stigum á eftir toppliði Arsenal og einu stigi á undan nágrönnum sínum í City.

Liverpool-menn brosa líka út að eyrum eftir helgina. Luis Suárez skoraði tvö mörk í 4-0 sigri Liverpool á Fulham en sigurinn hefði getað orðið miklu stærri. Suárez er búinn að skora 8 mörk í 6 leikjum síðan hann sneri til baka úr leikbanninu.

Chelsea tapaði stigum á móti WBA á heimavelli og missti bæði Liverpool og spútniklið Southampton upp fyrir sig á töflunni.

Það er hægt að sjá yfirlit yfir leiki helgarinnar með því að smella á myndbandið hér fyrir ofan.