Mark Wilshere dugði ekki til

Arsenal varð af mikilvægum stigum í toppbaráttu ensku úrvalsdeildarinnar í knattspyrnu í dag er liðið gerði 1-1 jafntefli við West Brom á The Hawthorns.

Lundúnaliðið var sterkari aðilinn í leiknum en gekk illa að skapa sér góð færi í heldur tilþrifalitlum fyrri hálfleik. Skömmu fyrir lok hans kom Claudio Yacob heimamönnum yfir með fallegum skalla eftir fasta fyrirgjöf frá hægri.

Arsene Wenger, knattspyrnustjóri Arsenal, brást fljótlega við stöðunni í síðari hálfleik og skipti hinum funheita Aaron Ramsey útaf fyrir Thomas Rosicky. Breytingin bar árangur þegar Jack Wilshere skoraði fallegt mark með skoti utan teigs eftir undirbúning Olivier Giroud.

Arsenal dauðlangaði í stigin þrjú og skipti Wenger meira að segja Nicklas Bendnter inn á í leit sinni að sigurmarkinu. Allt kom fyrir ekki og liðin skiptu með sér stigunum.

Arsenal fer upp fyrir Liverpool í toppsæti deildarinnar þrátt fyrir jafnteflið. Liðin hafa sextán stig og sömu markatölu en Arsenal hefur skorað fleiri mörk. West Brom, sem lagði Manchester United í síðustu umferð, hefur níu stig rétt neðan við miðja deild.