Kátt í Bretlandi

Mikil fagnaðarlæti brutust út í Bretlandi þegar tilkynnt var um fæðingu sonar Vilhjálms Bretaprins og Katrínar hertogaynju af Cambridge. Barnið fæddist klukkan hálf fjögur að staðartíma og tilkynningin barst almenningi fjórum tímum síðar. Fæðingin gekk vel og var drengurinn var 15 merkur þegar hann kom í heiminn.

Fjölmargir höfðu safnast saman við St.Mary sjúkrahúsið í Paddington í London þar sem barnið kom í heiminn, og einnig við Buckingham-höll. Segja má að ákveðinn viðskiptaheimur hafi myndast í kringum fæðinguna, en fáar þungaðar konur hafa vakið jafn mikla athygli og Katrín. Þá hafa síðustu vikur verið opnaðir ýmsir veðbankar þar sem hægt er að giska á þyngd og kyn barnsins og leggja peninga undir.

Talið er að rúmlega þúsund ljósmyndarar og blaðamenn hafi beðið barnsins við sjúkrahúsið í dag. Þeim gefst fyrst tækifæri til að taka myndir afbarninu á morgun, en þá mun fjölskyldan að öllum líkindum yfirgefa spítalann.

David Cameron, forsætirráðherra Bretlands, sendi hamingjuóskir til nýbökuðu foreldrana á Twitter-síðu sinni. „Allt landið mun fagna í kvöld, þið verðið dásamlegir foreldrar.“

Cameron spjallaði einnig við fjölmiðla fyrir utan Downing stræti 10.