Newcastle endaði sigurgöngu Chelsea

Newcastle endaði sex leikja sigurgöngu Chelsea í öllum keppnum og varð fyrsta liðið til að vinna lærisveina Jose Mourinho síðan 18. september þegar Newcastle vann 2-0 sigur í leik liðanna á St. James' Park í ensku úrvalsdeildinni í dag.

Yoan Gouffran og Loïc Remy skoruðu mörk Newcastle sem komu bæði á síðustu 22 mínútum leiksins. Newcastle-liðið var miklu betra í seinni hálfleiknum og það var gríðarlegur fögnuðu á St. James' Park þegar sigurinn var í höfn.

Þetta hafði nefnilega ekki verið góð vika fyrir Newcastle-menn eftir tap fyrir nágrönnunum í Sunderland um síðustu helgi og tap fyrir Manchester City í framlengingu í enska deildarbikarnum í vikunni.

Chelsea átti möguleika á því að komast á toppinn með sigri en liðið missti fyrir vikið Liverpool upp fyrir sig á markatölu. Newcastle komst hinsvegar upp í 9. sætið en þetta var aðeins annar deildarsigurliðsins í síðustu sex leikjum.

Chelsea komst næst því að skora í fyrri hálfleiknum þegar boltinn fór tvisvar í slá í sömu sókninni á 13. mínúu. Fyrst átti John Terry skalla í slá eftir horn Juan Mata og Branislav Ivanovic tók síðan frákastið og skaut í varnarmann og ofan á slána.

Yoan Gouffran kom Newcastle í 1-0 með skalla eftir aukaspyrnu frá Yohan Cabaye á 68. mínútu. Loïc Remy bætti við öðru marki á 89. mínútu eftir frábæran undirbúning Vurnon Anita. Þetta var sjötta deildarmark Frakkans á tímabilinu.

Staðan í ensku úrvalsdeildinni.