Villas-Boas: Sé það á brosi Defoe að hann er ánægður hér

Andre Villas-Boas, knattspyrnustjóri Tottenham, er viss um að Jermain Defoe verði áfram á enska félaginu og freistist ekki af því að taka tilboði frá MLS-liðinu Toronto FC.

Ryan Nelsen, knattspyrnustjóri Toronto FC, spilaði með Jermain Defoe hjá Tottenham fyrir tveimur árum síðan og ætlar að nýta sér það að Jermain Defoe er ekki fastamaður hjá Spurs á þessu tímabili. Defoe á 18 mánuði eftir af samningi sínum.

Villas-Boas vill frekar nota 26 milljón punda manninn Roberto Soldado en Jermain Defoe hefur engu að síður skorað átta mörk á tímabilinu. Defoe er hinsvegar markalaus á þeim 169 mínútum sem hann hefur fengið að spila í ensku úrvalsdeildinni.

„Ég hef séð að blöðin eru skrifa um áhuga frá Toronto en við viljum að leikmaðurinn verði áfram með okkur og spili út samninginn sinn," sagði Andre Villas-Boas við Sky Sports.

„Leikmaðurinn er markahæsti leikmaður liðsins á tímabilinu og hann er að elta markamet félagsins í Evrópu sem hlýtur að hvetja hann til að spila áfram með Tottenham," sagði Villas-Boas.  '

Jermain Defoe hefur tjáð sig opinberlega um áhyggjur sínar af því að fá ekki að spila í ensku úrvalsdeildinni en hann er að berjast um sæti í HM-hópi enska landsliðsins.

„Ég tel að hann sé mjög ánægður, ekki bara vegna þess sem hann hefur afrekað en einnig af því að ég sé það á brosinu hans. Hann er að byrja betur en á síðasta tímabili og þetta er leikmaður sem allir vilja hafa í sínu liði," sagði Villas-Boas.