Begovic marka-markvörður Stoke: Ég finn til með Artur Boruc

Asmir Begovic, markvörður Stoke, skoraði eina mark síns liðs í dag þegar hann skoraði yfir allan völlinn eftir aðeins fjórtán sekúndna leik. Markið dugði þó ekki til sigurs því Southampton skoraði og tryggði sér 1-1 jafntefli.

„Það er skemmtilegt að skora en ég hafði heppnina með mér. Ég finn til með Artur Boruc að fá svona mark á sig en þetta var gott stig fyrir okkur," sagði Asmir Begovic við BBC.

„Markvörður lítur ekki vel út þegar hann fær á sig svona mark og ég vildi því ekki fagna markinu. Vonandi á ég samt eftir að skora fleiri á ferlinum," sagði Begovic.

„Það er erfitt að spila í svona vindi og það er ekki hægt að spila við verri aðstæður. Það er hægt að ráða við bleytuna en í svona vindi veit maður ekkert hvert boltinn er að fara," sagði Begovic.

„Ég vil bara gleyma þessu marki sem fyrst. Ég kenni vindunum um þetta mark. Ég bið liðsfélagana og stuðningsmennina afsökunar en hvað get ég sagt. Ég lofa því að ná þessum tveimur stigum til baka," sagði Artur Boruc, markvörður Southampton.