Aaron Ramsey: Eitt af bestu mörkum mínum á ferlinum

Aaron Ramsey, miðjumaður Arsenal, skoraði sitt tíunda mark á tímabilinu þegar hann gerði seinna mark Arsenal í 2-0 sigri í toppslagnum á móti Liverpool. Hann var kátur í leikslok.

„Við nutum þess að spila í dag og það voru allir klárir. Stuðningsmennirnir stóðu líka með okkur," sagði Aaron Ramsey við BBC.

„Þeir mættu með fullt sjálfstraust inn í leikinn en við komust í gegnum byrjun leiksins og fórum í gang," sagði Ramsey sem skoraði frábært mark.

„Ég sá að Kolo Toure steig aðeins til baka og ég hugsaði af hverju ekki að láta bara vaða. Þetta var frábær stund fyrir mig. Ég hef miklu meira sjálfstraust fyrir framan markið í ár en þetta er eitt af bestum mörkum mínum á ferlinum," sagði Aaron Ramsey en Arsenal er nú með fimm stiga forskot á toppi ensku úrvalsdeildarinnar.

„Við höfum verið að elta efstu liðin síðustu tímabil en ef við verðum í góðri stöðu í janúar þá verður þetta farsælt tímabil," sagði Aaron Ramsey.