Brendan Rodgers: Betra liðið vann

Brendan Rodgers, knattspyrnustjóri Liverpool, horfði upp á sína menn tapa sannfærandi á móti sterku liði Arsenal í toppslag ensku úrvalsdeildarinnar í kvöld.

„Betra liðið vann. Þeir stjórnuðu leiknum betur en við ógnuðum allan tímann. Hreyfanleiki og sendingageta þeirra var betri en hjá mínu liði," sagði Brendan Rodgers við BBC en Liverpool hefði farið á toppinn með sigri.

Liverpool fékk vissulega færi til að skora í þessum leik en heimamenn í Arsenal fóru líka illa með nokkur mjög góð tækifæri.

„Við náðum aldrei að senda boltann nógu vel en við héldum samt áfram allan leikinn. Það er hægt að kryfja deildina eftir tíu leiki. Mínir leikmenn hafa verið frábærir og við eigum möguleika á því að ná einu af fjórum efstu sætunum," sagði Rodgers.

Liverpool er í 3. sæti fimm stigum á eftir Arsenal og með lakari markatölu en Chelsea sem tapaði líka í dag.