United sló Liverpool út úr deildabikarnum í endurkomu Suarez

Javier Hernández skaut Manchester United áfram í enska deildabikarnum í kvöld þegar hann skoraði eina markið í 1-0 sigri á Liverpool á Old Trafford í kvöld. Leikurinn var opinn og skemmtilegur og vissulega færi til að skora fleiri en eitt mark.  

Luis Suárez lék þarna sinn fyrsta leik með Liverpool á tímabilinu en hann átti í upphafi leiktíðar eftir að taka út sex leiki í banni sínu fyrir að bíta Chelsea-manninn Branislav Ivanovic á síðustu leiktíð.

Liverpool var betra liðið í fyrri hálfleiknum og Luis Suárez gerði sig nokkrum sinnum líklegan til að skora en hann var í þriggja manna framlínu með þeim Victor Moses og Daniel Sturridge.

Það var hinsvegar Manchester United sem skoraði fyrsta markið sem reyndist verða sigurmarkið. Markið skoraði Javier Hernández af stuttu færi eftir að hornspyrna Wayne Rooney datt fyrir fætur hans í markteignum. Markið kom eftir aðeins 39 sekúndna leik í seinni hálfleik.

Luis Suárez var alltaf hættulegur og átti meðal annars skot í slá úr aukspyrnu í seinni hálfleiknum.