Southampton upp í þriðja sætið - úrslit dagsins í enska boltanum

Southampton ætlar ekki að gefa neitt eftir í ensku úrvalsdeildinni því liðið vann sannfærandi 4-1 sigur á Hull í ensku úrvalsdeildinni í dag. Southampton komst upp í þriðja sætið með þessum sigri þar sem að Chelsea tapaði stigum á heimavelli á móti WBA.

Morgan Schneiderlin, Rickie Lambert og Adam Lallana komu Southamton í 3-0 í fyrri hálfleiknum og í þeim seinni innsiglaði Steven Davis sigurinn eftir að Yannick Sagbo hafði minnkað muninn. Southampton hefur unnið 6 af 11 leikjum sínum og aðeins tapað einu sinni. Þetta var líka bara fimmta markið sem liðið fær á sig.  

Liverpool er komið upp í annað sætið eftir 4-0 stórsigur á Fulham á Anfield en sigurinn hefði getað verið miklu stærri. Úrúgvæmaðurinn Luis Suárez skoraði tvö mörk fyrir Liverpool í þessum leik og hefur þar með skorað átta mörk í sex deildarleikjum á leiktíðinni. Steven Gerrard átti frábæran leik og lagði upp þrjú marka Liverpool-liðsins.

Chelsea og West Bromwich Albion gerðu 2-2 jafntefli á Brúnni í dag en gestirnir voru að vonum svekktir í leikslok enda hársbreidd frá sögulegum sigri. Afar umdeild vítaspyrna í uppbótartíma kom í veg fyrir að West Bromwich Albion yrði fyrsta liðið til að vinna Chelsea á Stamford Bridge í ensku úrvalsdeildinni í tíð Jose Mourinho.

Aron Einar Gunnarsson og félagar í Cardiff City þurftu að sætta sig við 2-0 tap á móti Aston Villa á Villa Park. Aston Villa var ekki búið að skora í fjórum síðustu deildarleikjum sínum og hafði aðeins náði í samtals tvö stig í október og nóvember. Þetta voru því langþráð mörk og stig hjá Villa-mönnum í dag. Aron Einar Gunnarsson var í byrjunarliðinu hjá Cardiff en var tekin af velli á 65. mínútu þegar staðan var enn markalaus.

Crystal Palace og Everton gerðu markalaust jafntefli í London en Palace-menn náðu þarna að enda sjö leikja taphrinu sína.



Úrslit og markaskorarar í ensku úrvalsdeildinni í dag:

Aston Villa - Cardiff    2-0

1-0 Leandro Bacuna (76.), 2-0 Libor Kozák (84.)

Chelsea - West Bromwich    2-2

1-0 Samuel Eto'o (45.), 1-1 Shane Long (61.), 1-2 Stéphane Sessègnon (68.), 2-2 Eden Hazard, víti (90.+6).

Crystal Palace - Everton    0-0

Liverpool - Fulham    4-0

1-0 Sjálfsmark (23.), 2-0 Martin Škrtel (26.), 3-0 Luis Suárez (36.), 4-0 Luis Suárez (54.)

Southampton - Hull    4-1

1-0 Morgan Schneiderlin (16.), 2-0 Rickie Lambert, víti (30.), 3-0 Adam Lallana (37.), 3-1 Yannick Sagbo (55.), 4-1 Steven Davis (89.)

Staðan í ensku úrvalsdeildinni.