Yeovil setur eigið stúlknaband á laggirnar

Þó svo að Yeovil vermi nú botnsæti ensku B-deildarinnar deyja forráðamenn félagsins ekki ráðalausir í viðleitni sinni að efla stuðning við liðið sitt.

Félagið hefur tekið höndum saman með útgáfufyrirtæki og er ætlunin nú að stofna stúlknaband sem mun spila á heimaleikjum liðsins. Eru vonir bundnar við að sveitin muni afla sér vinsælda sem muni nýtast til laða nýja stuðningsmenn að félaginu.

Enskir fjömiðla greina frá því að þetta sé í fyrsta sinn sem knattspyrnufélag komi að stofnun stúlknabands. Fyrirmyndin mun vera bandaríska hljómsveitin Pussycat Dolls og verða áheyrnarprufur haldnar nú strax í byrjun desember.

Ef vel gengur mun nýskipuð hljómsveitin spila á heimaleikjum Yeovil strax á þessu tímabili. Ætlunin er að gefa út lag með nýju sveitinni en allur ágóði af sölu hennar mun renna til góðgerðarmála.