Liggur ekkert á að ræða nýjan samning

David Moyes, stjóri Manchester United, segir að félagið ætli ekki að hefja samningaviðræður við Wayne Rooney í náinni framtíð.

Rooney á átján mánuði eftir af núverandi samningi en hann hefur tvívegis farið fram á sölu frá félaginu undanfarin ár. Hann mun hafa skoðað stöðu sína vel í sumar en hefur spilað sérstaklega vel að undanförnu og virðist njóta sín á vellinum.

Rooney skoraði tvívegis í 2-2 jafntefli gegn Tottenham um helgina en Moyes sagði eftir leikinn að það væri enginn að æsa sig út af samningsstöðu Rooney.

„Þetta verður allt gert þegar að það verður tímabært. Þá mun viðeigandi fólk ræða við hann,“ sagði Moyes.

„Wayne stóð sig vel um helgina. Hann er að spila vel og að skora mörk. Þegar tækifærið býðst þá grípur hann það. Hann hefur lagt mikið á sig og hefur uppskorið eftir því. Hann á það allt saman skilið.“