Segir fjölmiðla vilja grafa undan sér

Andre Villas-Boas, stjóri Tottenham, hefur staðið í ströngu í samskiptum sínum við enska fjölmiðla síðustu daga.

Í síðustu viku var starf hans sagt hanga á bláþræði eftir slæmt 6-0 tap fyrir Manchester City fyrir rúmri viku.

Hann segir gagnrýni fjölmiðla setta fram með það að markmiði að koma höggi á félagið, hann sjálfan og leikmennina.

„Sá hinn sami ber ekki virðingu fyrir mér, félaginu eða leikmönnunum,“ sagði Villas-Boas sem lenti í rifrildi við blaðamann á blaðamannafundinum eftir 2-2 jafntefli liðsins gegn Manchester United í gær.

Hann gat þó ekki svarað því hver stæði að baki þessum aðgerðum. „Ég veit það ekki en ég er viss um að þú getur frætt mig um það,“ sagði hann þá við þann sem spurði.