Sjö stjórar farnir á einni viku

Owen Coyle hætti í dag sem knattspyrnustjóri b-deildarliðs Wigan en það eru aðeins sex mánuðir síðan Coyle tók við núverandi bikarmeisturum Wigan. Coyle er um leið sjöundi stjórinn á einni viku sem missir starfið í tveimur efstu deildunum í Englandi.

Owen Coyle tók við liði Wigan af Roberto Martinez í júní og stefnan var að koma liðinu aftur upp í úrvalsdeildina. Wigan vann hinsvegar aðeins 7 af 23 leikjum sínum undir hans stjórn og er nú sex stigum frá sæti sem gefur þátttökurétt í umspilinu um laust sæti í ensku úrvalsdeildinni.

Wigan lenti 0-3 undir á móti Derby um helgina eftir aðeins 29 mínútur og tapaði á lokum 1-3. Þetta var þriðja tap liðsins á heimavelli á síðustu átta dögum.

Wigan byrjaði vel í Evrópudeildinni, fékk fimm stig út úr fyrstu þremur leikjunum en töp á móti Rubin Kazan og Zulte Waregem í síðustu leikjum þýðir að Wigan þarf að treysta á önnur úrslit til þess að komast í 32 liða úrslitin.

Aðalliðsþjálfarinn Graham Barrow og aðstoðarknattspyrnustjórinn Sandy Stewart munu stýra liði Wigan í næsta leik sem er á móti Leeds strax á miðvikudaginn.

Hér fyrir neðan má sjá lista yfir þessa sjö knattspyrnustjóra sem eru nú atvinnulausir en sex þeirra stýrðu liðum í ensku b-deildinni.



Sjö farnir á einni viku:

25. nóvember: Guy Whittingham (Portsmouth)

27. nóvember: Richie Barker (Crawley)

28. nóvember: Sean O'Driscoll (Bristol City)

30. nóvember: David Flitcroft (Barnsley)

1. desember: Martin Jol (Fulham)

1. desember: Dave Jones (Sheffield Wednesday)

2. desember: Owen Coyle (Wigan)