Essien gæti farið í janúar

Umboðsmaður Michael Essien, leikmanns Chelsea, útilokar ekki að kappinn yfirgefi félagið þegar opnað verður fyrir félagaskipti um áramótin.

Fjölmörg stór félög í Evrópu hafa áhuga á honum að sögn umboðsmannsins Fabian Piveteau en þar spilar stórt hlutverk að Essien er enn gjaldgengur með öðrum liðum í Meistaradeild Evrópu.

„Michael var ekki á leikmannalista Chelsea fyrir Meistaradeildina,“ sagði Pivetau. „Því er mögulegt að við finnum lausn á þessu máli á næstu tíu dögum.“

Hann útilokaði þó að Essien snúi aftur til franska félagsins Bastia þar sem hann hóf atvinnumannaferilinn.

„Michael spilar hjá Chelsea sem er stórt félag. Hann ætti mögulega heima hja PSG eða Lyon í franska boltanum en ekki Bastia eða Sochaux með fullri virðingu fyrir þeim félögum.“