Clarke rekinn frá West Brom

Stjórn West Brom ákvað í kvöld að reka knattspyrnustjórann Steve Clarke eftir 1-0 tap liðsins gegn Cardiff í dag.

West Brom tapaði í dag sínum fjórða leik í röð og er liðið aðeins tveimur stigum frá fallsæti. Clarke og aðstoðarmaður hans, Kevin Keen, hafa báðir hætt störfum hjá félaginu.

Fyrir aðeins mánuði síðan tilkynnti stjórnin að til stæði að halda viðræður við Clark um nýjan samning.

Keith Downing, einn aðstoðarmanna Clarke, mun stýra liðinu þar til að nýr stjóri verður ráðinn.

Clarke tók við starfinu af Roy Hodgson í júní í fyrra. Það var hans fyrsta starf sem knattspyrnustjóri en hann hafði áður starfað sem aðstoðarstjóri hjá Chelsea, West Ham og Liverpool.

Undir hans stjórn náði West Brom áttunda sæti ensku úrvalsdeildarinnar á síðustu leiktíð en liðið hefur þó aðeins unnið átta leiki á árinu 2013.