Lögreglukona handtekin vegna árásar á Steven Gerrard

Götublaðið Mirror greinir frá því að maður hafi ráðist að Steven Gerrard, fyrirliða Liverpool, utan við matvöruverslun nærri heimili hans í Liverpool í ágúst.

Gerrard er sagður hafa verið einn á ferli þegar hann steig út úr Range Rover jeppa sínum við búðina. Maðurinn hótaði Gerrard, jós svívirðingum yfir hann og sló til hans áður en hann flúði á brott.

Lögreglumenn tóku skýrslu af fyrirliða Liverpool og er málið enn í rannsókn samkvæmt frétt Mirror. Sömuleiðis er til rannsóknar hegðun lögreglukonu í kjölfarið. Sú er grunuð um að hafa ætlað að leka myndbandsupptöku af atvikinu. Þótt atvikið hafi átt sér stað fyrir rúmum þremur mánuðum virðist ekki liggja fyrir hvar rannsókn málanna stendur.

Gerrard verður í eldlínunni með Liverpool sem sækir Hull heim klukkan 14.05 í dag. Leikurinn verður í beinni á Stöð 2 Sport 2 & HD og sömuleiðis í beinni textalýsingu hér á Vísi.