Wenger telur enska boltann 99,9% lausan við brask

„Ég tel ekki að úrslitum í leikjum á Englandi sé hagrætt. Við búum hins vegar í alþjóðavæddum heimi án landamæra sem stöðva starfsemi sem þessa. Þetta er vandamál sem verður að tækla.“

Þetta sagði Arsene Wenger meðal annars á blaðamannafundi í gær í aðdraganda heimsóknar Arsenal til Cardiff í dag. Tveir hafa verið handteknir á Englandi grunaðir um að hagræðingu úrslita í ensku deildarkeppninni.

„Ég held að 99,9% enska boltans sé laus við hagræðingu úrslita. Þegar þú sérð gleðina í augum leikmanna þegar þeir skora, jafnvel í neðstu deildunum, og ástríðuna til dæmis hjá stuðningsmönnum Barnet þá trúi ég ekki að vandamálið viðgangist á Englandi.“

Wenger kannast við hagræðingu úrslita frá því hann þjálfaði Monaco í Frakklandi snemma á tíunda áratugnum. Þá voru Frakklands- og Evrópumeistarar Marseille sakfelldir fyrir spillingu og vísað úr Evrópukeppnum af UEFA. Wenger telur að vinna verði hörðum höndum til að koma í veg fyrir hagræðingu úrslita.

„Er hægt að koma fullkomlega í veg fyrir þetta? Ég er ekki viss. Þetta veldur mér ekki aðeins áhyggjum. Þetta er skömm í mínum huga.“