Langskot Tottenham dugðu ekki til sigurs

Englandsmeistarar Manchester United jöfnuðu í tvígang í heimsókn sinni til Tottenham í ensku úrvalsdeildinni í knattspyrnu í dag.

Leikurinn á White Hart Lane var stórskemmtilegur en það var bakvörðurinn Kyle Walker sem kom heimamönnum á bragðið. Í fjarveru Gylfa Þórs Sigurðssonar og Christian Eriksen fékk Walker að taka aukaspyrnu utan teigs. Boltinn smaug undir varnarvegginn og í markið.

Walker var þó ekki lengi í hetjuhlutverkinu. Skömmu síðar sendi Antonio Valencia boltann fyrir markið frá hægri. Walker misreiknaði boltann það illa að úr varð sending á Wayne Rooney sem stóð opinn á markteig. Augnabliki síðar lá boltinn í netinu og staðan orðin 1-1. Þannig stóðu leikar í hálfleik.

Jafnræði var með liðunum framan af síðari hálfleik þar til Brasilíumaðurinn Sandro fékk boltann um 30 metra frá marki United. Miðjumaðurinn var ekkert að skafa af því, lét vaða og boltinn söng efst í markhorninu. Markið má sjá í spilaranum að ofan.

Augnabliki síðar elti Danny Welbeck sendingu inn á vítateig Spurs. Hugo Lloris kom hlaupandi út á móti, braut á þeim enska og vítaspyrna dæmd. Rooney skoraði sjálfur úr spyrnunni og jafnaði metin í 2-2.

Bæði lið fengu þokkaleg færi til að tryggja sér sigur í leiknum en allt kom fyrir ekki. Jafntefli niðurstaðan. United er áfram í 8. sæti deildarinnar með 22 stig og Tottenham í 9. sæti með 21 stig.