Lukaku og Rodgers: Frábær leikur

Romelu Lukaku tók þátt í sínum fyrsta grannaslag Everton og Liverpool í dag. Hann lét heldur betur til sín taka. Skoraði tvö mörk í 3-3 jafntefli liðanna.

"Þetta er það skemmtilegasta sem ég hef lent í með félagsliði. Það var synd að við skildum ekki vinna en það gengur vonandi næst," sagði Lukaku.

Brendan Rodgers, stjóri Liverpool, tók í sama streng enda var leikurinn stórbrotin skemmtun.

"Þetta var frábær leikur þar sem veitti ekki af sprengitöflum. Við sýndum seiglu enn eina ferðina og komum til baka. Það er erfitt að koma hingað og ekki tilviljun að Everton hafi ekki enn tapað leik hér í vetur," sagði Rodgers.

"Við hefðum átt að komast 3-1 yfir og þar með slátra leiknum. Eftir það gátum við ekki haldið boltanum og ég var svekktur með dekkun okkar í hornum. Í heildina var þetta frábær leikur og gott að tapa ekki."