Villas-Boas: Tapið var of stórt

„Þetta var erfið byrjun fyrir okkur. Eftir það fóru öll plön í vaskinn,“ sagði Andre Villas-Boas þjálfari Tottenham eftir 6-0 tapið gegn Manchester City í dag þar sem Jesus Navas skoraði fyrsta markið eftir 14 sekúndna leik.

„Þetta var erfitt fyrir okkur og ekki margt jákvætt í okkar leik eftir það. Við brugðumst ágætlega við fyrstu mörkunum en þetta gerðist svo hratt. Einu færin sem við fengum komu í fyrri hálfleik, ef við hefðum jafnað í 1-1 hefði þetta orðið annar leikur.

„Við mættum ekki einbeittir til leiks en leikmenn brugðust við á jákvæðan hátt. Það gekk ekkert upp hjá okkur, þeir skoruðu úr öllum sínum færum og tapið var of stórt,“ sagði Villas-Boas.

„City lék frábærlega og við vorum mjög lélegir. Það er mitt að lyfta leikmönnum upp, það er alltaf annar leikur handan við hornið. Við þurfum að svara fyrir þetta í Evrópudeildinni.

„Við þurfum að skammast okkar og sýna okkar rétta andlit eftir þetta tap.“